كل عام وانتم بخير ..

 

رمضان

كل عام وانتم بخير ..

الحمد لله الذي بلغنا رمضان وبلغه احبابنا بالصحه والعافيه..

وينعاد عليكم يارب ..

 

* حقوق الصوره محفوظه لاصحابها اللي ماعرف مين هم 😉

اتجاه تدويني … رائع .

انتشر التدوين بالايام الحاليه انتشار كبير , وخصوصا مع توفير خدمات التدوين المجانيه ( اللي قاطه عليهم ساره !) , ولمن نجي لأنواع المدونات الموجوده نلقاها يا اما مدونات عامه وشخصيه او متخصصه بمجال معين , والان ظهر نوع من المدونات اللي يتحدث فيها شخص عن تجربة معينة مثلا دراسه او فترة علاجيه ينقل فيها كل التطورات اول بأول , من هذه المدونات زرت مدونة  باللغة الانجليزية وكانت صاحبتها تحكي عن رحلة علاجها بتقويم الاسنان الجراحي , حيث هذا النوع من العلاج يتستغرق مدة عامين غالبا , تحدثت فيها المدونة  عنها من اول زياره للطبيب مرفقه معها الصور الفوتغرافيه والاشعات , الى اخر زياره بعد انتهائها من العلاج , الكثير من  اللي بيجربون نفس العلاج راح يستفيدون , ويتجنبون بعض الاخطاء اللي حدثت مع غيرهم .

اتمنى هالنوع من التدوين ينتشر ,ونشوف تجارب كثير منشورة عن طريق التدوين  تتكلم عن تفاصيل دراسة معينه اوعلاج او اي تجربة اخرى.

سارة وانفلونزا الخنازير… !!

زي ما الكل عارف انفلونزا الخنازيرصارت وباء عالمي والكل خايف يسافر ومن هالكلام , بالنسبة لي ما اهتميت كثير وكنت اقول حتى لو جاتني انا مناعتي قويه (باااين!!) وما تضر الا الاطفال وكبار السن واللي فيهم امراض بحكم مناعتهم ضعيفة, وخلال سفري حيث الخمسين الف حالة جديده كل اسبوع بالمدينة اللي سافرت لها !! وتحذيرات وقوانين الاهل والابتعاد عن الاماكن الزحمه !!, في احد الايام شربت كولا بارد وكان الجو بارد ! ولمن رجعت حسيت حلقي شوي يعورني وحراراتي شوي مرتفعه  , قلت الحين بنام وبكره كل شي تمام !! المشكله لمن قمت من النوم لقيت  انه جاني التهاب حاد بالحلق وحرارة راحت بعد ما اخذت خافض الحرارة لكن الالتهاب كل ماله يصير اسوأ ! جلست يومين طريحه الفراش !! والكل ابتعد عني لان  قرروا (سارة جاتها انفلونزا خنازير)!!!! حتى اختي اللي تشاركني الغرفه ترتكتني !!(عشان اختها اللي فيها انفلونزا خنازير ما تعديها !!!) الحاله استمرت يومين وباليوم الثاني كان الوضع من سئ لأسوأ, بالنسبة لي اول مره يجيني التهاب بهذي الطريقة وصداع ودوخه !! دايما  كنت اتذكر وقتها (يازين العافيه بس !!).

باليوم الثاني ما قدرت اتحمل  وكنت ارفض اروح مستشفى بالبدايه على اساس يوم وتروح , رحت المستشفى وكان شكلي باين المرض من وجهي ! اول ما قلت لهم ان فيني التهاب بحلقي على طول خلوني البس ماسك !! وانتظر بغرفه انتظار لوحدي !! حسيت وقتها صدق جاتني انقلونزا خنازير !! رحت لممرض بعدها اخذ مني الاعراض من بعدها رحت لدكتورة وشرحت لها ان اللي فيني التهاب بحلقي ودوخة وحرارة راحت من بعد خافض الحرارة , قالت لي التهاب عادي لان مافيني كحة ولا حرارة ولا الم بالمفاصل , وصرفت لي نفس المسكن اللي اخذته من قبل , والحمد لله  من ثاني يوم زوالت النشاط !!

من بعدها قررت ما استهون بأي شي !! حتى لو ان مناعتي حديدية !!