أهل الغرام… لكن هذي المرة بالسعودي !!

 aaaa1

قبل تقريبا سنتين كنت اتابع مسلسل  اسمه أهل الغرام, مسلسل سوري أشهر من النار عالعلم  الجزء الاول  كان ناجح جدا ومؤثر ومن افضل الأشياء اللي تابعتها بحياتي !! الان نزل جزء ثاني يكمل مسيرة الاول , مسلسل يحكي عن قصص حب تنتهي بنهايات حزينه !!

بما اني متابعته , قعدت افكر لو كان  هذا المسلسل بالسعودي كيف راح يكون وعن ايش راح يتكلم بحلقاته , قعدت اتخيل مجموعة قصص تنفع تنحط بأهل الغرام (السعودي) !!

ونقول بسم الله J..

الحلقة الآولى :

تحكي عن بنت اسمها نورا وولد اسمه خالد , خالد شاب بعقلية سعودية بحتة , كأي سعودي لازم تتوفر عنده وسائل تسلية ضرورية عشان يتعايش مع محيطه من الشباب: ترقيم ,بنات , بلوت,بلاي ستايشن, نوره بنت ( على نياتها) تحب خالد  وتحسب ان خالد يحبها  وفجأه تكتشف ان خالد يعرف مية غيرها وهي من المية اللي دخلو السلة !!

الحلقة الثانية:

ساره بنت لسا ببدايه العشرين وطايشه ومفلسعة وتعرف فلان وعلان وغيرهم , وغايتها تتسلى !! يجي يوم وتتعرف على احمد ويحبها بكل صدق ! وبما ان صحبتنا لعابة ومو راعية  خرابيط احمد على قولتها تسحب عليه  !! واحمد المسكين ينهار !!

الحلقة الثالثة:

محمد يحب هند !! وهند تحبه وماشية اوضاعهم تمام التمام !! ومر على علاقتهم  اكثر من سنتين !  واتفقوا على موضوع الارتباط , يروح محمد لأمه ويقولها ابغا اتزوج وحده احبها ! امه تقول لا انت ولدي ولا اعرفك وقلبي غضبان عليك ! واذا بتتزوجها محد بيساعدك وتتحمل مصاريف الزواج وانت ما تشوف الدرب ! واذا تزوجتها ما تدخل علي لا انت ولا زوجتك ولا عيالك ! تجيب لنا وحدة من الشارع !! ويترك محمد هند وينهارون الاثنين !

الحلقة الرابعة :

نواف يحب هالة , هالة تدرس بالمدرسة وينتظرها نواف لمن تتخرج عشان يتقدم لها , فجأة بليلة ما فيها ضو قمر ! تنخطب هالة واهلها يوافقون ! وتطير البنت من يدين نواف ! ولا تنسو منظر نواف وهو منهار بنهاية الحلقة وهالة تبكي يوم عرسها !

الحلقة الخامسة :

نوف تتعرف على واحد اسمه عبدالله من النت ! وتستمر علاقتهم  خلف الشاشة . ويجي يوم  عبدالله يبغا يشوف نوف ! ولمن يشوفها ما تعجبه ! وكل الحب يطير !! ويتركها !! عشان ما كانت بالمواصفات اللي يبغاها !! ولا ننسا منظر هالة المنهارة بالاخير !

الحلقة السادسة:

شهد تحب واحد اسمه عبد العزيز , عبد العزيز قرر انه يرتبط بشهد ويكلم امه وتروح تخطب البنت , وتطير شهد من الوناسه الفرحة مش سايعتها J ويتزوجو ويعيشو بسبات ونبات بس اول اسبوع ! بعدين عبد العزيز يبدا يشك بشهد !! وبالاخير يتطلقون !!

هذي القصص اللي جات ببالي  واللي عنده قصة يكمل لين تصير ثلاثين حلقة وينعرض المسلسل برمضان 😀

وبالاخير ! قصص الحب غير قابلة للتطبيق بمجتمعنا !! ومالها اي مستقبل !! اذا كانت غالبا تفشل بمجتمعات اكثر انفتاح من مجتمعاتنا !

 

Advertisements

18 فكرة على ”أهل الغرام… لكن هذي المرة بالسعودي !!

  1. ولا يمكن ان يكون قيس وليلى قد عاشا قصة حبهما في هذه الصحرا ء ..
    هذا ما كتبه محمد حسن علوان في رواية “سقف الكفاية”

    واظنه على حق ..

  2. الحلقة السابعة
    صالح يبدأ في حب بنت جيرانه ساره، ويقدم على الخطوة الشجاعة ويتقدم لها ، وبعد اخذ ورد وتردد ،الأب يوافق على زواجه ويعيش مع حبيبته ساره احلى لحظات حياته وينجب منها ولدين ، ولما حملت ساره بالثالث يتوفى ابوها، ويقومون اخوان سارة برفع قضية للمحكمة يطالبون بتطليق صالح من ساره لأنه مش من مواخيذهم، والقاضي يوافق على الدعوى ويحكم بفصل صالح عن سارة في نفس يوم ولادة الأبن الثالث …
    =======

    مسلسل ولا احلى
    بس ياليتج ماسميتي البطل في اول حلقة خالد خخخخخخخخخ

  3. الحلقة الثامنة :
    وليد وخولة اولاد عم من يوم ماهما صغار كانوا يقولو انو الاثنين لبعض كبروا وحبوا بعض ومرت الايام والحب موجود .. الأهل صحيو على نفسهم وسارو يقولو لا ومانبغى ويضغطوا على الاثنين يتركوا بعض .. في الاخير الولد اتزوج والبنت ماقدرت تكمل حياتها وفضلت بدون زواج ..
    ..

    وكل يوم حكاية ورواية ..
    ونزيف المشاعر يستمر ..

  4. وبالاخير ! قصص الحب غير قابلة للتطبيق بمجتمعنا !! ومالها اي مستقبل !! اذا كانت غالبا تفشل بمجتمعات اكثر انفتاح من مجتمعاتنا !

    صادقة….ياما شفنا مسلسلات بالواقع المخزي..

    ننتظر مسلسلك 🙂

  5. زهير..عليك نور :)..
    ماشي صح .. اسمك جا بالصدفة باول حلقة 🙂 قعدت ساعة اخترع اسامي D:
    ايانق..دائما البنت هي الضحية وهي الطرف اللي يتأثر اكثر !
    ام رغد .. اذا تعرفي منتج ومخرج لا تبخلي علينا 🙂

  6. الحلقة التاسعة والأخيرة :]
    بندر يعرف ستين بنت ، ويكلمهم ويحب على وحدة ومن بكرا يتعرف على عشرة بدالها
    رشا غصب عنها مالت او حبت واحد حب جدا عذري
    اهل بندر عرفوا عطوه كلمتين تهزئية ومشى الوضع بدون ما يسحبون منه اي امتيازات
    وبعد كم سنة يزوجونه عشان يعقل وفعلا يتزوج احسن البنات
    بس رشا دروا اهلها بطرف السالفة وطاح فيها اخوها ضرب ومنعوها من النت ومن الجوال
    ومن كل شي يوصلها بالحياة الخارجية وصارت عار .. وصاروا يحسون انها لايمكن تتزوج على هالعار اللي سوته اللي هو الحب .. بينما نفس العار سواه بندر .. بس على بندر حلال وعلى رشا حرام

  7. يا سلاااااام
    إبداع 😀

    تحمست اشوف 30 حلقه منه !
    اصلاً ليه 30 !! هي القصص نفسها نفسها بس تتغير الحبكه حبتين بتغيير الزمان والمكان وعكس الأدوار 😛 وتصير حلقات جديده من مسلسل أهل الغرام (بالسعودي)

    أحلى حاجه اقرأها قبل ما انام 😀
    وسعتي صدري عسى أيامك دوم فرح وسرور

  8. دموع .. ليش الاخيره نبغا نكملها ثلاثين D:
    استاذ محمد الصالح .. العفو واسعدني مرورك 🙂
    حنان.. الله يسعدك يا بطة 🙂

  9. هاهاهاهاها خطيييييييييييييييييير المسلسل والاخطر الحلقة السادسة عزوز وشهد
    الحلقة العاشرة :

    أنس قروي (يعني جاي من القرية ) يدرس بالمدينة .. وماعنده ماعند جدتي..اهبل وضروسه طالعه لقدام ودايما يحسب نفسه كشخه ..اسلوبه يضحك ومرة بسيط في تفكيره وعلى نياته .. وفجأة يتطور ويطلع جوال عشان يواكب التطور .. ومن زود الدلاخة يبي يكلم خويه >كلم رقم ثاني بالغلط وفجأة يطلع صوت بنت (اسمها نورة ) وينشب لها نشبة قوية لانو مو مصدق انو سمع صوت بنت بالجوال ..وبعد فترة قامت نورة تعطيه وجه لانو يكسر الخاطر وعلى نياته ومامنه خوف ..وفجأة قامت ترسل له صورها لانها تحس انو على نياته ..وبعد فترة انقلب أنس النياتي الى أنس الحقير لانو أثر فيه التمدن والتحضر 😦 وقام يهدد نورة بصورها وانو يفضحها وبعدين (طووووط <<< قطعته السعودية يعني ماراح احد يفهم ) وبعدين حملت منه وجابوا بيبي معوق ..وفي النهاية زوجوا أنس من نورة غصب وعاشوا في تعاسة لانو كان اساسهم غلط من البداية .. اهئ اهئ <<< ههههههه انواع الحزن في نهاية المسلسلات الخليجية..

    الحلقة الحادية عشر:

    (تركي آل)… انسان من الطبقة الناعمة ودايما يصيف بباريس وبمربية وبجنيفا ..وبالمقابل (سوهاج آل).. انسانة من الطبقة المخملية وجدا راقية وناعمة وجمالها حوووري وشفافة ..
    دايما يقابلون بعض في الصيف ودايما تطلع استفهامات داخل كل واحد تقول احنا شايفين بعض من قبل بس وييين ؟
    وبعدين تزوج (تركي آل) غصب من بنت عمه (روقيه مش آل ..لانها مرة شينه وماينتطالع فيها ..هههه)
    وبعد فترة قابل سوهاج بالشانزلزيه وكانت مسويه لها بوتيكس ومتغيرة اشويه وصايرة اشين من اول …وفجأة وقف تركي قدام سوهاج وكلن ينبض قلبه 140 نبضة بالدقيقة من الربكة.. وتوه تركي بيسأل سوهاج الا ويجيه كعب رقية زوجته يمشي مليون على عينه ..وبالنهاية صار تركي اعور ورضا برقية وعاش بقية حياته وهو يندب حظه ..هههههههههههههههههه

    الحلقة الثانية عشر :

    صنقوح مايطلع من بيتهم الا ومتكشخ كأنوه معرس ..كل يوم على ذا الحال .. ويحاول يتميلح على البنات في الشوارع .. وفجأة ويتعرف على منفوشة الكشكوشة بعد مليون محاولة وتوه يتعلق فيها ويحبها ..وبعد يومين من الحب اتصل عليه خويا له قديم من زمان ماشافه ويمره بسيارة منفوشة الكشكوشة وينصدم صنقوح صدمة قوية خلته يعترف لخويه ..وبعد مااعترف لخويه انجلد وتكفخ صنقوح لمن تاب من حركات نص الكم ..ههههههههه

    الحلقة الثالثة عشر :

    زياد ابن اصل وفصل بس مطفر .. وحصة من طرطش لي بس بطرانة ..تعرفوا على بعض عن طريق ولد عم زياد لانو بطراان .. زياد خق على حصة وحبها وعاشوا قصة غرام اطفال لمدة سنتين وبعدها قرروا الارتباط ورفضت ام زياد .. وفجأة وإذا بزياد يقرر انو ينحاش من السعودية مع حصة ..وللاسف انحاشوا وعاشوا بحب ووئام<< لانو مسلسل سعودي ماتصلح تصير قصة حب..هههههههه

    باقي قصص بس والله تعبت .. تقبلوا خرابيطي:) 🙂

  10. باااك مرة ثانية 🙂

    الحلقة الرابعه عشر :

    فيصل انسان قبيح بمعنى الكلمة خلقا وخولقا …. الجوري انسانة بمنتهى الرقة والذوق والجمال … فيصل اضاف الجوري بالنت من الفوروورد .. وجلس يتميلح على الجوري لمدة سنتين لمن جلست تتكلم معاه .. وبعدها جلس يفرد عضلاته بالكذب وانوه ولد آل وانوه هامور وعنده عماير وسيارات فخمة جدا (طبعا كذاب ماعنده الا عراوي وغرفته تلوع الكبد ) .. الجوري بدت تصدقه لانوه يجيب صور ماادري من وين يبوقها .. ويتعب وهو ينسق الصور .. وفجأة بدت الجوري تميل لهذا الانسان الكذاب وبدت يغرها المظاهر والفلوس الي عند فيصل .. وفي يوم من الايام فيصل واعد الجوري في احد المقاهي ا وتسلف سيارة فخمة من خويه وتعب نفسه وهو يتكشخ بالكذب .. المهم تقابلوا بالمقهى وانصدمت الجوري بقبح فيصل وتحملته على اساس انوه بطران ..وبعد هالمقابلة حبته لانو شافت سيارته الفخمة وصدقت الكلام الي يقوله من سفرات وبيزنيس.. وبعد شهرين من الحب المزيف حاول فيصل يعترف لها لانو ماقدر يكمل كذباته ..ويوم اعترف لها سحبت عليه ولا كأنها عرفته وشطبته من الذاكرة …وبعد كذا ماقام يمد رجوله الا على قد لحافه …ههههههههههههه

    الحلقة الخامسة عشر :

    رائف الولد المدلل بين 6 بنات ..عاش وترعرع بين اخواته ويكره الطلعه مع الشباب لانو يعايرونه ويحاولون انو يتحرشون فيه جنسيا .. يحضر عزيمة خواته وماعنده اي مشكلة وصديقاته نفس صديقات اخواته وكل البنات عندوه فريندز ..وفي يوم من الايام صار فيه اعجاب من احد البنات له(اسمها دارين ) ووصلت الى مرحلة حب بس مستحية تقول له ودايما تتلصق فيه وهوا مايكن لها الا مشاعر الفريندز .. وبعد فترة يوم مالقت منه اي استجابة تحطمت وسكتت وحاولت تتجنب هالتفكير…ومع مرورو الايام صار رائف يعجب بدارين لمن وصل الى مرحلة الحب ويتلصق فيها ..وبعد فترة صارت خلوة بين رائف وبين دارين في غرفة احد من خواته .. وبعدها طاح الفاس بالراس ووقعوا بالمحظور ..سكتوا ولا كأ،وا صار شي ..لمن جا رائف بعد الحاح شديد من دارين وخطبها .. وبعدها صار بينهم شك وتفككوا وصاروا يمثلون للناس انهم بسعاده وهم بقمة التعاسة …

    الحلقة السادسة عشر :

    ناصر انسان يخاف من الهيئة لدرجة انو اذا شاف بنت بطريق يروح للطريق الثاني عشان مايوسوس له الشيطان .. ودايما يتحرشون فيه البنات لانو دايما ينزل عيونه ويخاف يحط عينه بعين بنت … وفي يوم من الايام رفع عينه وشاف انسانة متحجبة وتكلمه (عشان تسأله وين المكان الفلاني ) وفجأة تطب عليه الهيئة وتجلده لانو ثبت عليه انو يغازلها …هههههههه والله هيئتنا بعض المرات الله يهديهم يروحون للناس الضعفاء ويعاقبونهم …

    تقبلوا خرابيطي وافكاري 🙂

  11. الحلقة السابعه عشر :

    هيا تكملة لحلقة ناصر الي انجلد من الهيئة ..هههههه
    بعد ماجلدوه تغيرت اخلاق ناصر(حسبي الله على الي كان السبب ) وصار دنجوان كبير ويحاول يشبك بنات بس المشكلة انو ماقاموا يعطونه وجه زي اول (قاعدة: اذا بغيت الشي مايجيك )
    وفجأة تعرف على وحدة راسلن لها الرقم بالبلوتوث وانواع الاغراء بالعباية لانها كانت مخصرة وطالعه البنت كأنها كوكاكولا .. وقام يكلمها لمدة سنة ويحاول يطلع معاها لاغراض شيطانية .. المهم البنت اسمها دخون .. وكل مرة تتغلى على ناصر وترفض انو تطلع معاه وتقول انها تخاف من اخوانها لانهم كلهم يشتغلون بصالة رياضية واجسامهم تخوف …وفي يوم من الايام اصر ناصر انها تطلع معاه واذا ماطلعت راح يزعل وانها ماتحبه ومن هالخرابيط الي يسوونها المرضى من الشباب … ردت عليه وقالت له انا موافقة اني اطلع معاك بس انا خايفه ..قال لها لاتخافين واذا على اخوانك ماراح احد يدري لانو اجسامهم بس شكل .. المهم تواعدوا بحارة من الحواري على اساس انو تجي مع تاكسي وتنزل معاه السيارة … فجأة جا صالون جمس موديل قديم كأنه حق طقاقات ..ويوقف وتنزل منه دخون وتركب معاه السيارة وتفتح لناصر وجهها وينصدم انها عبدة وتبتسم ويلمع ضرس الذهب الي يحوم الكبد ..هههههههه
    ويقول لها انزلي من سيارتي لاابلغ الهيئة عليك …اشوي الا تنزل فرقة الطقاقات من الجمس وهيا مكونة من بنتين وثلاث خوال (اخوانها طلعوا فرقة طقاقات هههههه) … وقام ناصر يرجف ويقول وش ذا ..دخون مااتفقنا وش هالناس ..وش يبون مني …هههه
    ويجي اخوها ويقول له تحسب بنات الناس لعبة ويحط يده على كتف ناصر .. ويقول اسمع ياولد الناس اذا ماجيت وخطبت دخون بكرة انت مع اهلك والله راح تشوف شغلك وتكره الدنيا الي انت عايش فيها وانا اعرف بيتكم واعرف كل شي عنك … المهم مشى ناصر وهو حاط يده على راسه ومنصدم ومو مصدق الي صار له ..راح كلم امه وابوه وقال لهم ابي اتزوج والبنت موجودة وانا احبها لانها انقذت حياتي والف له قصة عشان يوافقون … المهم راحت الام وهيا مو مصدقة اختيار ناصر الي كان في يوم من الايام راكد (حسبي الله على الي كان السبب ) ..وتزوج ناصر من دخون بالغصب وعاش معاها حياة ذل واستبداد ..هههههههه

    الحلقة الثامنة عشر :
    ابو حمد رجال كبير بالسن وعيونه زايغة … قرر حمد ولده انو يجيب له ممرضة بس لازم تكون لابسة عباية ومتغطيةو تهتم فيه وترتب له العلاجات حقته …والمشكلة انو اذا جات تعطيه الدوا يفصلها تفصيل من عيونه (الله يهديه ) من ورا العباية .. وفي يوم من الايام قرر ابو حمد انو يتزوج الممرضة (جنسيتها سيريلانكية ) .. وقام يحن على ولده حمد انو يتزوج هالممرضة السريلانكية ويقول له وش فرقت انا حبيت هالممرضة زي ماحبيت امك وماراح اشوف وجهها و بدخل عليها متغطية يعني وش فرقت ياولدي ..رد عليه حمد تراها سريلانكية ماتقارنها بالوالدة ..قال له من يدري اني متزوجها ..المهم اقنع ولده حمد انو يتزوج هالممرضة ( الحب عذاااب ).. وتزوجوا ودخل على هالممرضة .. وهو في ليلة دخلته رفع حجاب زوجته السريلانكية وحبها بزيادة ههههه لانها اول حرمة يشوفها في حياته وكتب كل املاكه لها .. وعاش في سعاده وهناء مع الشغالة وكتب كل املاكه لها (عاد والله والاملاك كلها 20 الف مخزنها تحت مخدته لانو ناوي يتزوج ثالثة ههههه) بس الحمدالله ماجابت منه عيال .. هههه

    تقبلوا مروري 🙂

  12. عدنا :
    الحلقة التاسعة عشر :

    اكرم قال لي شاب رومانسي وحساس بس ماعنده حظ .. سعاد امرأة مطلقة تدور على لقمة العيش .. تعرفوا على بعض عن طريق موقع زواج بالنت … حبوا بعض في فترة وجيزة لانوو اكرم لسانه عسل ورومانسي في نفس الوقت .. تزوجوا عن حب .. وفي فترة حمل سعاد صارت تتوحم وتكره اكرم .. ولانو اكرم حساس طلق سعاد .. وبعد الولادة رجعوا يحبوا بعض بس للاسف راحت عليهم .. اتفقوا انو سعاد تتزوج صديق اكرم وبعدين يطلقها وترجع لاكرم .. المهم راح اكرم وقال السالفة لصديقه يوسف .. ووافق يوسف انو يتزوج سعاد ويطلقها بعدين … المهم تزوج يوسف سعاد على اساس يطلقها على اساس ترجع لاكرم … وبعد ماتزوجها حب يوسف سعاد لانها خبرة ورفض الطلاق وعاشوا بسعاده وهناء ..اما اكرم فمات من القهر ..

    الحلقة عشرين واقعية :

    محمد وصالح اخوان متحابين وعلى قلب واحد … ابتهاج بنت خالتهم … محمد الاخ الاكبر وكان يحب ابتهاج منذ الصغر … صالح الاخ الاصغر وعايش على البركة … محمد تزوج من بنت عمه نورة بعد ماخطبت له امه … جا وقت خطبة صالح وخطبت له امه ابتهاج ..تزوج صالح من ابتهاج وكانوا عايشين في بيت واحد مع اخوانه بما فيهم محمد وزوجته .. المهم محمد يتميلح على ابتهاج بحكم انو يحبها منذ الصغر .. وابتهاج تقبلت هالتميلح لدرجة انو صار بينهم مكالمات وحديث جانبي ..وزوجها صالح ياغفلين لكم الله .. اتفق محمد انو يتزوج ابتهاج كزوجة ثانية بعد مايطلقها صالح ..واتفقت ابتهاج انو تسبب مشاكل لصالح لمن يطلقها …

    وللاسف تطلقت ابتهاج من صالح وبعد شهور قليله تزوجت محمد اخوه بالسر ولامن شاف ولا من دري …بعد سنة اعلنوا الزواج وانصدم صالح من اخوه محمد لمن جاته حالة نفسية وسبب مشاكل مالها اول ولا تالي …

    سافر صالح خارج السعودية لمدة ثلاث سنين بدون ماحد يدري وبعدها رجع ومو طايق حتى نفسه …حاول محمد يرقع السالفه بعد الحاح كبير من العايلة وسوى نفسه انو بيطلق ابتهاج بعد ماجب منها بنت ..المهم صالح ماتزوج ولا فكر بالزواج من بعد ابتهاج ولاكان اساس زواجهم الحب ولاشي بس عشان الحالة النفسية الي يمر فيها …

    المهم الحين صار على هذي السالفة 15 سنة وصالح مو متزوج ولا يفكر بالزواج ..اما محمد عنده بنتين من ابتهاج ولا يكلم اخوه صالح .. اهئ اهئ

    دمتم سالمين ونأسف على الاطالة 🙂

  13. عدت

    الحلقة الحادية والعشرون :

    سمر انسانة محترمة جدا وتفكيرها بسيط وعلى نياتها وتعيش بالخبر واصلها من عرعر.. حمود انسان لامن شكل ولا من اخلاق يشتغل بالخبر واصله من عرعر ..تعرفوا على بعض عن طريق النت .. حمود عنده موقع نت ويسوي فيها انوه طموح (كأنو مافيه انسان طموح بهالدنيا الا هو ) وانوه عصامي وكل هالكلام يقوله لكل بنت يتعرف عليها بالنت .. وللاسف سمر كانت وحدة من هالبنات الي تعرفوا عليه و لانها نياتية حطت في بالها هالانسان وانوه فارس احلامها …

    بعد فترة تطورت الاحداث وصار يكلمون بعضهم بالجوال بعد اصرار كبير من حمود وانو يحبها ..طبعا سمر انبسطت وحست انها قربت من الهدف حقها وهو الارتباط فيه ..وماتدري المسكينة انو الشباب ماعندهم سالفة في هالشي ..قولي لهم حب بس لا تقولين لهم ارتباط لانو الكذب في الحب مرة سهل وخصوصا على البنات …هههه ياكرهي لكم يالي تكذبون ..

    وفي يوم من الايام جا لحمود ملل ويبي يغير وعنده بالنت الف بنت كل يومين يتسلى على وحدة ويسوي له اكشين …وقام يجافي سمر ولايعطيها وجه زي اول .. البنت اصابها نقص وهيا اولريدي متعلقه فيه .. المهم تكلم وهوا يسحب عليها باليوم والاسبوع ..وفجأة قامت تكلمه عن الارتباط وانو الناس المحترمة لازم ترتبط ومن هالكلام ..عاد هوا حط رجله وكنسلها من القائمة ..
    سمر سوت مناااحة ههههههههه كأنو ماحد حب الا هي وانها انصدمت من الحب .. عاد هو ياليته حبها .. الله يهدي شبابنا دايما يسوون عاهات قلبية للبنات وهما ماهمهم شي

    🙂

  14. الحلقة 22 هذي صارت لي اهئ اهئ:

    انا كنت اخاف من الحب الي اسمعه وكنت اخاف اني احب وانحب وكنت احذر الناس الي اعرفهم من هالحب الي ماوراه الا الكذب والاغراض الشيطانية …
    المهم تعرفت على انسانة بالنت وكنت مااكن لها اي مشاعر وكنت انصحها زي ماانصح غيرها وكنت اخاف على البنات بشكل عام من الذئاب البشرية … المهم صارت هالانسانة تعطيني وجه وتسولف وكمان انا هذرة واسولف كثير .. وكنا نجلس بالساعات على المسن ولااحس بنفسي ..وكنت دايما اقولها انتبهي لاتحبين ولايجي في بالك هالشي …في يوم من الايام ساعدتها ببحث كانوا طالبينه عليهم وكان وقتها متأخر ولازم تسلمه اليوم الثاني … جاتني فكرة في وقتها انو ليش ماتكلمها وتاخذ رقمها على اساس تكمل مساعدتها وقمت ابرر لنفسي انو نيتي خير وانو هذا الشي عادي ومامنه خوف ..

    طلبت منها اني اخذ رقمها ووافقت بس شرطنا على بعض انو مجرد البحث وبس …سويت البحث وأخلصت فيه لمن رتبته بزيادة .. المهم كلمتني بعدها وتشكرتني ولاني هذرة قمت اخذ واعطي معاها كأني بالماسنجر ..اهئ اهئ

    استمرت الايام بمكالمات الجوال وكان مافيها الا كل خير …وفي يوم من الايام حسيت انو قلبي ينبض وحسيت اني احب هالانسانة ولاني غبي ولااعرف اتحكم بمشاعري على طول قلت لها .. الانسانة مرة محترمة ومرة طيوبة وتنحب بزياادة (والله حبيتها لاشعوريا وكنت انصح انو لا احد يحب عن طريق غلط ..اهئ اهئ )

    الانسانة تقبلت الموضوع بكل ذكاء وحذر وقالت انو هالحب اذا تبيه يستمر لازم يكون بالحلال وهيا بتكون من اسعد الناس اذا صار هالشي ..قلت لها انا اوكي خلاص خلي هالفترة نشوف ونختبر مشاعرنا ..اهئ اهئ

    استمرينا نحاول نكتشف بعضنا وانا دايما اعصب فيها واختبر اعصابها ..والله ياعالم انها انسانة صبورة وخلوقة وانجحت في كل اختباراتي ..

    انا انسان حقير خفت من المسؤولية وخفت اني اقصر في حقها لمن ارتبط فيها ..على طول رحت قلت لها ترى مااقدر ولازم نتلاحق انفسنا وننفصل …والله اعرف اني ظلمتها بس من جد الانسانة الملاك لازم ترتبط بملاك زيها مو حقييير زيي ..اهئ اهئ 😦

    المهم كملت معاها لمدة سنة على اساس انو يمكن تتغير مشاعري وعطتني فرص كثيرة وانا ماستغليت ولا وحدة منهم 😦

    والله العظيم انها انسانة قمة في الاخلاق وقمة في التعامل والله يشهد انها ماقصرت معاي في شي 😦

    كان عذري الي مو مقبول :انو مابعد يجي الوقت وتصير عندي كلمة قوية عشان اواجه اهلي فيها 😦

    طبعا انفصلنا عن بعض والله يكون بعونها ويعوضها 😦

    نصيحتي ترى الكلام سهل بس الفعل اصعب … انتبهوا يابنات المسلمين ولاتاخذون بالكلام بس والله يوفقك وتلقون احد يصونكم ويحفظكم ..
    اعتذر على الاطالة بس ماعندي اي احد افضفض له هالسالفة ولاحبيت اذكر اسمها سترا عليها ولانها انسانة ملاك بالاخلاق …هذي اخر حلقة لي لاني تعبت نفسيا ويارب ماتتعذبون بالحب وبالغرام 😦

  15. اببدددداع طرحكم للموضوع وتفاعكلم والشكر موصول للجميع ..

    وانا ودي اضيف حلقة .. كلقة رقم 99 وابي واحد يضيف بعدها الحلقة الخيرة رقم 100
    انا اخترت قبل الاخيرة لأنها هي اللي يصير فيها أحداق مغايرة ..

    عموما الحلقة رقم 99 :-
    في شاب خلوق وطموح وحليوه ومتكتك .. وبنية شيطونه اسمها اسومه .. نشبت وهو ما يعرف هالامور هذي .. وحبته وما صدقها ..لأنه كان يتوقع انه ما فيه شي اسباب .. ومع الوقت حبوا بعض .. حب قووووي .. وبدا هم يلمح لأهله واول مره عااارضوه .. لكن لما شافوا ان الولد يحب البنت بقوه .. وهو بين لهم من كلامه انه يبيها حيل .. وصل الموضوع لأبوه وهااشه لين قال امين .. وبدا الولد يمون عليهم يقول لهم انا ابي اسوم ما ابيكم ابي اكلمها .. ابيها وش عليكم مني .. عرفوا ان ولدهم محجر الراس وزوجوه .. وافتكوا منه هو وزنه .. وكل يوم هو وحبيبته خناق .. بس يموتون ببعض .. وهوشاتهم تنتهي باعتذار واحداث حلوه >> فيس مستحي

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s