أنا .. وبطاقة الأحوال !

 قبل فترة كنت اتناقش مع وحده من زميلاتي عن بطاقة الاحوال اللي بالاخير (حزنو علينا) وسمحوا للنساء ان يكون لهم شرف ان يكون لها بطاقة احوال بدائية جدا بصورة الله يعلم كيف شكلها صاير !!, بالنسبة لي طلعت بطاقة أحوال في رمضان الماضي وأنواع الحوسة والزحمة اللي صارت معي حتى أصبح ممن يحملن بطاقة أحوال !!, ابتداء من البحث عن موقع المركز حتى تعبئة البيانات والانتظار !!واخيرا بالطريقة العجيبة اللي يمشي فيها دور التصوير.

أولا ما كنا نعرف اين مقر الاحوال وبعد سؤال  وخرايط وزحمة وصلنا هناك بحمد الله بقطع طريق الضباب حتى وصلنا كبري الوشم وقدامنا مسجد تابع للمبنى عرفت وقتها اننا وصلنا بحمد الله.

جبت الملف الاخضر العلاقي !! وعبيت بياناتي ودخلنا لقيت كل حريم الرياض هناك ! كنت اتوقع اني بدخل بلقي هناك الناس تنتظرني وتاخذ اوراقي على طول ! موظفة قالت لي ما نقدر نعطيك رقم اليوم تعالي بكره !! حاولت من هنا ومن هنا مافي امل !! مو مشكلة نرجع بكرة ! بالنسبة لي اول مره ادخل بمعمعة الدوائر  الحكومية وحزنت على الرجال وقدرت قد ايش احنا بنعمة !! .

رجعنا باليوم الثاني واخذت لي رقم (222) !! المهم دخلت والموجودات عددهم مره كثير ومافي غير موظفة وحدة مسؤولة عن تعبئة البيانات ! انتظرت لمن جا دوري وبما اني اجتماعيه !(قصدك ثرثارة) لابد من الحكي مع اللي جنبي !! اللي جنبي كانت طالبة كل يوم تروح الحي الدبلوماسي وتحتاج تطلع بطاقة احوال ,جا دوري وعبيت اوراقي أهم شي ما عجبتها صورة جوازي !! رحت للمديرة وحاست بالجواز ولقيت صورة ثانية قالت لي اسوي منها نسخه بدال صورة الجواز الاصليه !! خلصنا من الاوراق بعدها لازم انتظر دور التصوير ! فجأة اللي جنبي تقول شوفي هناك ! ايش اشوف؟؟ غرفة بابها مفتوح واشوف فلاش يولع ويطفي وحده تدخل والثانية تطلع على طول !! طلع ان السالفة تدخل وحده يولع الفلاش تقوم تدخل اللي بعدها على طول ويولع الفلاش !!!وقتها حسيت بالاحباط ! ,جا دوري والحمد لله كان دوري اخر وحده بالمجموعة يعني مافي وحدة بتدخل وراي على طول ,زبطت طرحتي وقلت للموظفة (عادي ابتسم!!!) وقتها لو كان معها نار كان ولعت فيني ! تصورنا وانتظرنا شوي تطلع البطاقة وصار عندي بطاقة أحوال بشكل وصورة بدائية جدا !!

البطاقة صار لها يمكن ست شهور الى الان محد قال لي لو سمحتي اثبات ؟! لا بمطار ولا غيره حتى الجامعات ما طلبتها ,يعني الى الان مافي اعتراف كامل لها واكتشفت ان استخدامها يكاد ينحصر بمجال سيدات الاعمال وشراء الاسهم او عشان تكتب اي شي باسمها او اذا تبغا تبيع ذهب  !!

بالنسبة لي فايدتها معنوية اكثر من حسية !! دائما اقول كيف اطلع من بيتي وانا ما معي اثبات !! كيف اقدر اثبت اني سارة بنت فلان بنت علان !! كثير ما يهمهم هذا الشي بس بالنسبة لي يهمني .والكثير ما يشوفون ان لها اي اهميه ! وبطاقة العائلة والجواز يفون  بالغرض !

بالنسبة لكم هل تتوقعون انها مهمة؟؟

Advertisements

8 أفكار على ”أنا .. وبطاقة الأحوال !

  1. كيف كنتوا عايشين من غير بطاقة أحوال؟
    لا من جد! مو مسألة حسية والا معنوية لكن مسألة اعتراف من الدولة انكم موجودين و على قيد الحياة!
    إلى الآن ما أصدق ان تسجيل الجامعات والمدارس معتمد على شهادة الميلاد! طيب شهادة الميلاد مداها تنسرق تضيع تتزور أي شي ممكن تتخيليه
    هنا بطاقة الأحوال أو الهوية معناها انتِ ككيان يشتري ويبيع ويدرس ويسافر ويتحرك ويشتغل.. وتسجيل المدارس والجامعات وفتح الحسابات في البنوك وملفات العيادات وغيرها يعني انت باختصار في بطاقة 🙂

  2. انا رحت للبنك وجددت اوراق بدون مايسئلون عن بطاقه احوالي رحت ببطاقه العائله والجواز
    ورحت للمستشفى بدون محد يطلبها مني والمطار محد يطلبها بعد

    << ما تذكر انه فيه احد طلب منها هالشي

    وحتى لو طلبوها ما طلعت لانه وقت دوامهم لا يتوافق مع وقت دوامنا السعيد لا تقولين لي سوسو روحي وقت الاجازه لانه الكسل نقمه صراحه

    <<< تكره الشحططه والحوسه

    هذا غير انه لو طلعتها وما استخدمتها وضاعت شوفي المشاكل المترتبه عليها

    بالنهايه استنتجت انه مالها اي داعي الا ان يثبت انه لها فائده بالحياه وقتها ممكن اروح اطلع
    لي بطاقه

    لا تقولين هويه واحس اني موجوده = لاني موجوده الحمد الله واعرف نفسي ما احتاج بطاقه تقول لي مين انا ولا انا وين موقعي من الاعراب

  3. بالطبع مهمة لكن الأهم هو : أولا توجيه أجهزة الدولة و الجهات الأخرى باستخدامها فعليا و تغيير قوانين التعريف التي تعود للعصر الجاهلييجب ان لا تفرق تلك القوانين بين رجل و امرأة.

    ثانيا تغيير عقلية المواطنين وطريقة تفكيرهم البدائية…. يجب أن يفتح الجميع أعينهم و يعقلون أن المرأة كيان عاقل مستقل , وأنه يمكن الاعتراف بوجودها الذي ليس بالضرورة أن يكون فقط من خلال ظل رجل محيط بها!!

  4. انا نفس حالتك بحياتي ما استخدمة بطاقة الاحوال ولا ادري وش فايدتها 😦 بس مسوية زحمة مع البطاقات في المحفظة ..

    – استخدمة البطاقة في فتح حساب بالبنك >> (1)

    – استخدمتها في فتح ملف في احد عيادات الاسنان >> (2)

    – استخدمتها في محل اشتريت قطعه ذهب وكان يسجل لي ورقة و اخذ رقم بطاقة الاحوال >> (3)

    – استخدمتها في التسجيل بالمعهد >> (4) + بطاقة العائلة لازم :d

    * استخدمها الان في زيارة ابوي للسجن 😦 الله يفك اسرة يارب

    :

    بس ترى باقي الدول يستخدمونها اكثر

  5. نعم مهمة .. ولا شك بذلك !

    حتى نحن الرجال .. تمر أشهر وربما سنوات لا يطلب فيها بطاقة الأحوال .. بطاقة الأحوال مجرد إثبات تحمله وقت الحاجة .. ولم يأتكِ بعد !

    بعد أن تكوني امرأة أعمال .. سيكون استخدامها بشكل يومي 🙂

  6. هي مهمة طبعا … في زمن أصبح الناس لا يعرفوكي الا بهذه البطاقة

    ومبروك عليكي البطاقة … كذا تقدري تكتبي في صفحتك الشخصية انك سعودية ومعاكي بطاقة الاحوال

  7. مو مهمة داييم والله نشوف الرجال مو دايم يستخدمونها ..
    اكثر شي اشوف ابوي يستخدمها لما يجي يطلعني من كليتي ..

    ومن جد صرنا في وقت لازم يكون فيه اِثبات لنفسك ..

  8. مبرووووك وصار عندك بطاقه 😀
    انا استخدمها اكثر في المستشفى :$ بما انه المكان اللي اتردد عليه اكثر شي
    وفي البنوك بس ..

    هو يكفي ان معك شي يثبت الهوية بس !

    😀

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s