النصيحه بجمل …. هل هي دائما كذلك؟؟

فتيات بحجاب في احد المراكز ..

شخص: غطوا ( وتقوم بالاشارة بيدها لغطاء الوجه) غطوا ترى انتو كبار !!

الفتيات : لا تعليق .

هل النصيحه هنا بجمل كما يقال دائما؟؟

اليس هناك اسلوب  افضل من ذلك لايصال النصيحه ؟

اليس هناك فرق بشكل الحجاب  ؟ هل هو مع زينة او غيرها؟

فقدان ذاكرة ..!

loss1

 

أعيش حالة .. فقدان ذاكرة..

مع كل من حولي ..

الا .. انت ..

ذكراك  .. شردت كل شئ حولها..

أبقتك .. داخلي ..

تطرد كل  نزيل..

كل من يحاول عبور جسوري..

كل من يرى ذلك الحزن .. حائرا يجول احشائي ..

اصبحت اسيرة ذكراك ..

لأعيش..

فقدان ذاكرة  … مغلف بحزن انيق ..

 

ربط حزام الأمان .. عادة اصبح البعض ربما يخجل منها !

seat_belt1

 موقف1: 

اجلس بالمقعد الامامي واقوم بربط الحزام !

 تعليق: سارة تستهبلين !!

تعليق اخر : سارة من جدك؟؟

الكثير من حولنا من لا يهتم بوضع حزام الامان عند ركوب السيارة وخاصة المقاعد الأمامية,قد يكون الدافع من ذلك الخجل من الانقياد للقوانين العامة  او المتعة في مخالفة القوانين العامه او ربما لآسباب اخرى !

هل تعلم ان :

·         معدل الوفيات سنويا –بالنسبة للمملكة العربيه السعودي- يصل الى 7 آلاف حالة سنويا  اي 10% من مجموع الوفيات , وفي في المملكة يموت شخص كل ساعتين بسبب حوادث السيارات.

·         استخدام حزام الأمان يقلل من نسبة الوفاة أثناء الحوادث بما يعادل 50% لركاب المقعد الأمامي و60% لركاب المقعد الخلفي.

·         عدم استخدام الكبار لحزام الأمان يرسل رسالة خاطئة إلى أطفالهم أن استخدام حزام الأمان ليس ضرورياً.

·         أن المملكة تخسر حوالى 13 مليار ريال سنويًّا بسبب حوادث السيارات .

·         الشخص الذي لايقوم بربط الحزام يلزم بدفع غرامة مالية قدرها 400 ريال .

·         هناك بالمنزل من ينتظر عودتك سالما .

ماذا لو ننصح  كل من حولنا بربط الحزام ؟

البعض قد لا يتقبل ذلك ! وقد يوجد من يستهزأ عند سماع نصيحتك! لا تيأس فذلك واجبك تجاه الاخرين.

موقف 2 :

يدور حديث حول حي الحزام الذهبي بالخبر ! لم استمع الى الحوار وفجاة سمعت كلمة حزام وقلت : ( صراحة انا ما اقدر اركب قدام وما اربط الحزام مره ضروري لا سمح الله لو صار شي )

تخيلو الاحراج وقتها !! 

أهل الغرام… لكن هذي المرة بالسعودي !!

 aaaa1

قبل تقريبا سنتين كنت اتابع مسلسل  اسمه أهل الغرام, مسلسل سوري أشهر من النار عالعلم  الجزء الاول  كان ناجح جدا ومؤثر ومن افضل الأشياء اللي تابعتها بحياتي !! الان نزل جزء ثاني يكمل مسيرة الاول , مسلسل يحكي عن قصص حب تنتهي بنهايات حزينه !!

بما اني متابعته , قعدت افكر لو كان  هذا المسلسل بالسعودي كيف راح يكون وعن ايش راح يتكلم بحلقاته , قعدت اتخيل مجموعة قصص تنفع تنحط بأهل الغرام (السعودي) !!

ونقول بسم الله J..

الحلقة الآولى :

تحكي عن بنت اسمها نورا وولد اسمه خالد , خالد شاب بعقلية سعودية بحتة , كأي سعودي لازم تتوفر عنده وسائل تسلية ضرورية عشان يتعايش مع محيطه من الشباب: ترقيم ,بنات , بلوت,بلاي ستايشن, نوره بنت ( على نياتها) تحب خالد  وتحسب ان خالد يحبها  وفجأه تكتشف ان خالد يعرف مية غيرها وهي من المية اللي دخلو السلة !!

الحلقة الثانية:

ساره بنت لسا ببدايه العشرين وطايشه ومفلسعة وتعرف فلان وعلان وغيرهم , وغايتها تتسلى !! يجي يوم وتتعرف على احمد ويحبها بكل صدق ! وبما ان صحبتنا لعابة ومو راعية  خرابيط احمد على قولتها تسحب عليه  !! واحمد المسكين ينهار !!

الحلقة الثالثة:

محمد يحب هند !! وهند تحبه وماشية اوضاعهم تمام التمام !! ومر على علاقتهم  اكثر من سنتين !  واتفقوا على موضوع الارتباط , يروح محمد لأمه ويقولها ابغا اتزوج وحده احبها ! امه تقول لا انت ولدي ولا اعرفك وقلبي غضبان عليك ! واذا بتتزوجها محد بيساعدك وتتحمل مصاريف الزواج وانت ما تشوف الدرب ! واذا تزوجتها ما تدخل علي لا انت ولا زوجتك ولا عيالك ! تجيب لنا وحدة من الشارع !! ويترك محمد هند وينهارون الاثنين !

الحلقة الرابعة :

نواف يحب هالة , هالة تدرس بالمدرسة وينتظرها نواف لمن تتخرج عشان يتقدم لها , فجأة بليلة ما فيها ضو قمر ! تنخطب هالة واهلها يوافقون ! وتطير البنت من يدين نواف ! ولا تنسو منظر نواف وهو منهار بنهاية الحلقة وهالة تبكي يوم عرسها !

الحلقة الخامسة :

نوف تتعرف على واحد اسمه عبدالله من النت ! وتستمر علاقتهم  خلف الشاشة . ويجي يوم  عبدالله يبغا يشوف نوف ! ولمن يشوفها ما تعجبه ! وكل الحب يطير !! ويتركها !! عشان ما كانت بالمواصفات اللي يبغاها !! ولا ننسا منظر هالة المنهارة بالاخير !

الحلقة السادسة:

شهد تحب واحد اسمه عبد العزيز , عبد العزيز قرر انه يرتبط بشهد ويكلم امه وتروح تخطب البنت , وتطير شهد من الوناسه الفرحة مش سايعتها J ويتزوجو ويعيشو بسبات ونبات بس اول اسبوع ! بعدين عبد العزيز يبدا يشك بشهد !! وبالاخير يتطلقون !!

هذي القصص اللي جات ببالي  واللي عنده قصة يكمل لين تصير ثلاثين حلقة وينعرض المسلسل برمضان 😀

وبالاخير ! قصص الحب غير قابلة للتطبيق بمجتمعنا !! ومالها اي مستقبل !! اذا كانت غالبا تفشل بمجتمعات اكثر انفتاح من مجتمعاتنا !

 

أنا .. وبطاقة الأحوال !

 قبل فترة كنت اتناقش مع وحده من زميلاتي عن بطاقة الاحوال اللي بالاخير (حزنو علينا) وسمحوا للنساء ان يكون لهم شرف ان يكون لها بطاقة احوال بدائية جدا بصورة الله يعلم كيف شكلها صاير !!, بالنسبة لي طلعت بطاقة أحوال في رمضان الماضي وأنواع الحوسة والزحمة اللي صارت معي حتى أصبح ممن يحملن بطاقة أحوال !!, ابتداء من البحث عن موقع المركز حتى تعبئة البيانات والانتظار !!واخيرا بالطريقة العجيبة اللي يمشي فيها دور التصوير.

أولا ما كنا نعرف اين مقر الاحوال وبعد سؤال  وخرايط وزحمة وصلنا هناك بحمد الله بقطع طريق الضباب حتى وصلنا كبري الوشم وقدامنا مسجد تابع للمبنى عرفت وقتها اننا وصلنا بحمد الله.

جبت الملف الاخضر العلاقي !! وعبيت بياناتي ودخلنا لقيت كل حريم الرياض هناك ! كنت اتوقع اني بدخل بلقي هناك الناس تنتظرني وتاخذ اوراقي على طول ! موظفة قالت لي ما نقدر نعطيك رقم اليوم تعالي بكره !! حاولت من هنا ومن هنا مافي امل !! مو مشكلة نرجع بكرة ! بالنسبة لي اول مره ادخل بمعمعة الدوائر  الحكومية وحزنت على الرجال وقدرت قد ايش احنا بنعمة !! .

رجعنا باليوم الثاني واخذت لي رقم (222) !! المهم دخلت والموجودات عددهم مره كثير ومافي غير موظفة وحدة مسؤولة عن تعبئة البيانات ! انتظرت لمن جا دوري وبما اني اجتماعيه !(قصدك ثرثارة) لابد من الحكي مع اللي جنبي !! اللي جنبي كانت طالبة كل يوم تروح الحي الدبلوماسي وتحتاج تطلع بطاقة احوال ,جا دوري وعبيت اوراقي أهم شي ما عجبتها صورة جوازي !! رحت للمديرة وحاست بالجواز ولقيت صورة ثانية قالت لي اسوي منها نسخه بدال صورة الجواز الاصليه !! خلصنا من الاوراق بعدها لازم انتظر دور التصوير ! فجأة اللي جنبي تقول شوفي هناك ! ايش اشوف؟؟ غرفة بابها مفتوح واشوف فلاش يولع ويطفي وحده تدخل والثانية تطلع على طول !! طلع ان السالفة تدخل وحده يولع الفلاش تقوم تدخل اللي بعدها على طول ويولع الفلاش !!!وقتها حسيت بالاحباط ! ,جا دوري والحمد لله كان دوري اخر وحده بالمجموعة يعني مافي وحدة بتدخل وراي على طول ,زبطت طرحتي وقلت للموظفة (عادي ابتسم!!!) وقتها لو كان معها نار كان ولعت فيني ! تصورنا وانتظرنا شوي تطلع البطاقة وصار عندي بطاقة أحوال بشكل وصورة بدائية جدا !!

البطاقة صار لها يمكن ست شهور الى الان محد قال لي لو سمحتي اثبات ؟! لا بمطار ولا غيره حتى الجامعات ما طلبتها ,يعني الى الان مافي اعتراف كامل لها واكتشفت ان استخدامها يكاد ينحصر بمجال سيدات الاعمال وشراء الاسهم او عشان تكتب اي شي باسمها او اذا تبغا تبيع ذهب  !!

بالنسبة لي فايدتها معنوية اكثر من حسية !! دائما اقول كيف اطلع من بيتي وانا ما معي اثبات !! كيف اقدر اثبت اني سارة بنت فلان بنت علان !! كثير ما يهمهم هذا الشي بس بالنسبة لي يهمني .والكثير ما يشوفون ان لها اي اهميه ! وبطاقة العائلة والجواز يفون  بالغرض !

بالنسبة لكم هل تتوقعون انها مهمة؟؟