مطر وقوس قزح

اليوم صورت الصوره وحسيت اني مصوره ما حصلتش!!!تذكرت انه من زمان واحنا بالرياض ما جانا مطر… يارب ارزقنا مطر..
قعدت افكر اذا الدنيا كذا كيف الجنه؟؟ يا رب ارزقنا الجنه يا رب وكل المسلمين

انا من مؤيدي قيادة المرأة للسيارة

كثير اللي بيقرا اللي راح اكتبه من الفئة الذكوريه بيقول(انتو يالبنات مرتاحين والسواقين تحت يدينكم)..بذكر كم حالة تايد اللي اقوله..
اول حالة…تقوم العائلة الصباح استعداد للدوام وتلقى السواق حاط مفتاح غرفته والسيارة عند الباب الرئيسي وماشي…ببساطه لانه اغتر
بكلام (السواقين الغير نظاميين) بانه يشتغل بطريقه غير نظامية ويحصل على راتب قدره 1700 ريال وممكن يوصل 2000 ريال من غير مساومه!!..طيب هذي العائلة والدهم مسافر مين يودي مدارس وجامعات ..التكسي حل مؤقت

ثاني حالة…ام تسكن بمنطقة تبعد عن الرياض 100 كيلو وعندها موعد مستشفى بالرياض واضطر زوجها للسفر فجأه ومافي وسائل مواصلات بالمنطقه ايش تسوي…؟؟؟تلغي موعدها وزوجها لا يسافر مره ثانيه

ثالث حالة…عائلة (من غير عائل) الوالد متوفي وعندهم اطفال (الاولاد ما يقدرون يسوقون سيارات) وغير قادرين على تكاليف التكاسي كل شوي لو يملكون سيارة متواضعه بتصير قيمتها اقل من تكاليف التكاسي لمده سنة باعتبار تكلفة المشاوير اليوميه 40 ريال لمده سنه تصير 14600 ريال اتوقع مبلغ يكفي لامتلاك سيارة متواضعه

الحالات هذي موجوده وبكثرة لكن مين يسمعهم…وفي غيرهم كثير وبظروف مختلفه ..راح تصير مشاكل و الدوله قادره على السيطرة على الوضع… اشاعات كثير تقول النظام راح يتطبق واشاعات تقول ما راح يصير
بالاخير الله يكتب اللي فيه الخير لنا…

موقف غريب!! والله لا يفجعكم بغالي يا رب..

امس رايحه مركز غرناطة مع ماما وفرح وعليا(اخواتي:)) وانا مااحب النوعية هذي من المراكز لانها قريبه من الاحياء السكنية (ما عليكم مني افكاري غريبه نوعا ما)المهم كان السوق زحمه وكتمه ووضع ابدا مو حلو..
وازمه ادور لي ملابس كم طويل عشان السفر ومافي اي شي كم طويل!!!وشو يعني مايبوني اتحجب!!! وبعد ما قفلت المحلات رحنا بنطلب اكل عشان نتعشى ونرجع البيت ونفس الروتين..قعده اللاب توب واكل فشار والتلفزيون شغال على نور ومهند
المهم قلت لفروحه روحي اطلبي وزي اي اخوات وليش ما تطلبين انتي وذكرتها اني قبل ثلاث شهور لمن طلعنا مع خالي العزيز انا اللي طلبت وكان الوضع نفسه زحمه كانه مقصف ابتذائي!!!
اختي راحت تطلب ومعها الخدامه عشان تشيل الاغراض وطولت كلمتها قالت خلاص ما بقي شي وماعرف ليش دقيت عليها بعد شوي
الا تقول سارا تعالي مو قارده اشيل الاغراض واستغربت ورحت لها
وانا واقفه قدام ماكدونالدز واناديها وتلف علي وتدوخ … انا انفجعت وقعدت احاول وارفعها واصرخ فرح..فرح وما قدرت امسك نفسي
اول مره احد يطيح قدامي ومين اختي؟؟؟؟
حاولت اركز واشوف اختي تتنفس واذا قلبها ينبض مررره خفت حسيت وقتها قد ايش الانسان ضعيف..
كانت بنت معي تهديني وتقولي لا تصرخين الحين تقوم ..مره شكرا كانت معي وهدتني..
والحمد لله شوي واختي تقوم.. وقالت انها ما تدري ايش صار لها امي كانت بعيده والحمد لله ما شافت بنتها الا وهي قامت الحمد لله وطلع اللي جاها هبوط عشان مااكلت كويس بنفس اليوم
الحمد لله على سلامتك واحبك فروحه والله يخليك لنا يا رب